Wie is die Kakamas Belangegroep?

Gedurende 2018 dreig Eskom om die Kai !Garib-munisipaliteit aan doelbewuste kragonderbrekings te onderwerp omdat die plaaslike owerheid nie sy grootmaat-elektrisiteitsaankope betaal nie. In hierdie tyd gaan Suid-Afrika gebuk onder kwaai kragonderbrekings omdat Eskom se opwekkingskapasiteit tydens die administrasie van President Jacob Zuma uitgehol is – soos bewys deur die Zondo-kommissie.

Landbou-ondernemings en ander besighede in Kakamas besef dat meer kragonderbrekings die produktiwiteitsbasis van die dorp se ekonomie verder sal wegvreet. Nie net sou dit die voortbestaan van Kakamas se besighede bederig of belemmer nie, maar verdere werkskepping was ook in gedrang.

Die Kakamas Belangegroep word gedurende November 2018 tydens ’n vergadering in die Kakamas Landbouverenigingsaal as ’n vereniging in die lewe geroep. 

Die oogmerke van die vereniging sluit in:

• Om as ’n vereniging verteenwoordigend vir sy lede van Kakamas op te tree en in belang van die vereniging skakeling te hê met die Kai !Garib-munisipaliteit, die provinsiale en nasionale regerings, en ander instansies soos nodig.
• Om bystand te verleen en saam te werk met enige van hierdie genoemde liggame wanneer nodig, deur middel van advies of aanbevelings in sake wat betrekking het op die munisipale belange van die vereniging se lede.
• Om in die algemeen instrumenteel te wees of om mee te help om enige saak wat tot voordeel van die vereniging sal wees te bevorder en ten uitvoer te bring.
• Om inligting rakende munisipale sake aan lede te versprei.